ກ່ຽວກັບສູນບໍລິການ ອສຄ

“ປັດຈຸບັນພວກເຮົາມີສະມາຊິກ ຫຼາຍກວ່າ 500 ຫົວໜ່ວຍທຸລະກິດ ທີ່ສາມາດປະສານສົມທົບໄດ້ໂດຍກົງ ຮ່ວມກັບບັນດາສະມາຄົມ ແລະ ເຊັ່ນດຽວກັນກັບ ສະພາການຄ້າ ແລະ ອຸດສາຫະກຳຂັ້ນແຂວງ, ເຊິ່ງ ສຄອຊ ແມ່ນກະບອກສຽງຂອງພາກທຸລະກິດໃນ ສປປ ລາວ. ບັນດາຫົວໜ່ວຍທຸລະກິດຈະປະສົບຜົນສຳເລັດໄດ້ ແມ່ນຂຶ້ນກັບຄຸນນະພາບຂອງຊັບພະຍາກອນມະນຸດ, ເຊິ່ງເປັນຫົວໃຈສຳຄັນທີ່ມີຜົນຕໍ່ການດຳເນີນງານຂອງພາກທຸລະກິດ. DCT ແມ່ນທ່າແຮງໃນການກຽມຄວາມພ້ອມໃຫ້ ນັກສຶກສາ ກ່ອນການກ້າວເຂົ້າສູ່ຕະຫຼາດແຮງງານ ໂດຍໃຫ້ພວກເຂົາມີສ່ວນຮ່ວມ ຢູ່ໃນຂະບວນການສໍາຄັນຂອງທຸລະກິດ ໃນລະຫວ່າງທີ່ພວກເຂົາຮຽນຕົວຈິງຢູ່ທີ່ສະຖານປະກອບການ.”

“ຜ່ານ ສູນບໍລິການ ອາຊີວະສຶກສາແບບຄວບຄູ່, ສຄອຊ ເປັນຜູ້ນຳພາ ແລະ ສະໜັບສະໜູນ ການພັດທະນາວຽກ ອາຊີວະສຶກສາ ໂດຍຖືເອົາ DCT ເປັນຮູບແບບການຈັດການຮຽນ-ການສອນ ທີ່ມີຄຸນວຸດທິ ເພື່ອສອດຄ່ອງກັບຄວາມຕ້ອງການຂອງພາກທຸລະກິດ. ສູນນີ້ ຈະໃຫ້ບໍລິການແກ່ສະຖານປະກອບການທີ່ແມ່ນສະມາຊິກ ແລະ ຍັງບໍ່ແມ່ນສະມາຊິກ ເພື່ອກຽມຄວາມພ້ອມຂອງພວກເຂົາ ຈັດຕັ້ງປະຕິບັດວຽກງານ DCT ໃຫ້ມີຄວາມສະດວກສະບາຍ.”