ການຢັ້ງຢືນ
ການຢັ້ງຢືນ ນຳເອົາຜົນປະໂຫຍດ ແລະ ການຍອມຮັບເພີ່ມເຕີມ ໃຫ້ກັບສະຖານປະກອບການຂອງທ່ານ. ຜົນປະໂຫຍດທີ່ຈະໄດ້ຮັບ ແມ່ນນັບຕັ້ງແຕ່ ການຫຼຸດຄ່າເຂົ້າຮ່ວມຝຶກອົບຮົມທີ່ຈັດໂດຍ LNCCI ແລະ ການມີສ່ວນຮ່ວມໃນວາລະ ຫຼື ງານສຳຄັນລະດັບສູງ ແລະ ການເຂົ້າຮ່ວມສົນທະນາເພື່ອປຶກສາຫາລືຢ່າງເປັນທາງການກັບພາກລັດຖະບານ.
LNCCI ຈະອອກໃບຢັ້ງຢືນ ເພື່ອການຮັບຮອງຄວາມສຳເລັດໃຫ້ແກ່ ຜູ້ທີ່ສຳເລັດການຝຶກປະຕິບັດທີ່ສະຖານປະກອບການ ແລະ ພະນັກງານຂອງສະຖານປະກອບການຜູ້ທີ່ສຳເລັດການຝຶກອົບຮົມ ໂດຍຈະອອກໃບຢັ້ງຢືນດັ່ງຕໍ່ໄປນີ້:
- “ຄູຝຶກທີ່ໄດ້ຮັບການຮັບຮອງ DCT” ສຳລັບຜູ້ທີ່ໄດ້ສຳເລັດຊຸດຝຶກອົບຮົມ “ການວາງແຜນເພື່ອການຈັດຕັ້ງປະຕິບັດ DCT”.
- “ຜູ້ປະເມີນຜົນທີ່ໄດ້ຮັບການຮັບຮອງ DCT” ສຳລັບຜູ້ທີ່ໄດ້ສຳເລັດການຝຶກອົບຮົມ “ການປະເມີນ/ການຈັດການສອບເສັງ”.
ຜົນປະໂຫຍດ
ຄູຝຶກທີ່ໄດ້ຮັບການຮັບຮອງ DCT:
- ມີບຸກຄະລາກອນທີ່ມີຄຸນວຸດທິ ໃນສະຖານປະກອບການຂອງທ່ານ ໃຫ້ການແນະນຳ/ຖ່າຍທອດຄວາມຮູ້ທີ່ມີປະສິດທິພາບ ໃນດ້ານການຄຸ້ມຄອງ ແລະ ປະສານງານ ການຈັດຕັ້ງປະຕິບັດ DCT ກັບສະຖານອາຊີວະສຶກສາ.
- ມີໂມດູນໃນການຝຶກອົບຮົມທີ່ສາມາດປັບປ່ຽນໃຫ້ສອດຄ່ອງກັບສະພາບການ ແລະ ຊ່ວຍໃຫ້ຄູຝຶກຂອງສະຖານປະກອບສາມາດນຳໃຊ້ຄວາມຮູ້ຂອງເຂົາເຈົ້າເຂົ້າໃນການປະຕິບັດ ແລະ ການພັດທະນາພະນັກງານຜູ້ອື່ນໆຂອງສະຖານປະກອບການຂອງທ່ານ ໂດຍສະເພາະໃນຂົງເຂດດ້ານເຕັກນິກວິຊາການທີ່ກ່ຽວຂ້ອງ.
- ໃບຢັ້ງຢືນທີ່ໄດ້ຮັບການຍອມຮັບ ໃນທົ່ວປະເທດ ໂດຍພາກທຸລະກິດໃນທ້ອງຖິ່ນທັງໝົດ.
ຜູ້ປະເມີນຜົນ/ຜູ້ດຳເນີນການສອບເສັງ ທີ່ໄດ້ຮັບການຮັບຮອງ DCT:
- ມີບຸກຄະລາກອນທີ່ມີຄຸນວຸດທິ ໃນການດຳເນີນການປະເມີນດ້ານທັກສະ ສຳລັບພະນັກງານຜູ້ອື່ນໆ.
- ມີຂະບວນການປະເມີນຜົນພາຍໃນຢ່າງເປັນປົກກະຕິ ໂດຍ ສາມາດນຳໃຊ້ເຂົ້າໃນການພັດທະນາບຸກຄະລາກອນ ແລະ ການປະກັນຄຸນນະພາບ.
ບົດປະກອບຄຳເຫັນ
“ຂ້າພະເຈົ້າເຊື່ອແນ່ວ່າ DCT ແມ່ນຄວາມພະຍາຍາມທີ່ມີຄຸນຄ່າ ແລະ ມັນກໍ່ເປັນການເປີດໂອກາດໃຫ້ນັກຮຽນໄດ້ຊອກຫາເສັ້ນທາງອາຊີບ ແລະ ມີປະສົບການໃນການເຮັດວຽກ. ໂຮງແຮມຫຼວງພະບາງວິວ ໄດ້ຮັບນັກຮຽນເປັນຈຳ ນວນຫລາຍໃນໄລຍະຫລາຍປີທີ່ຜ່ານມາ, ເນື່ອງຈາກພວກເຮົາໄດ້ມີສ່ວນຮ່ວມໃນການພັດທະນາຫລັກສູດ DCT ຕັ້ງແຕ່ເລີ່ມຕົ້ນ. ພວກເຮົາຈະສືບຕໍ່ປະຕິບັດຮູບແບບນີ້ສຳລັບຜູ້ທີ່ມາເຂົ້າມາຝຶກປະຕິບັດຢູ່ໃນໂຮງແຮມຂອງພວກເຮົາທັງຜູ້ທີ່ກຳລັງຝຶກປະຕບັດຢູ່ ແລະ ຜູ້ທີ່ກຳລັງຈະເຂົ້າມາຝຶກໃໝ່ ເພາະບັນດານັກຮຽນໃນປະຈຸບັນຈະກ້າວອອກໄປເປັນພະນັກງານໃນອຸດສະຫະກຳການໂຮງແຮມອະນາຄົດ ພວກເຮົາຈະສືບຕໍ່ໃຫ້ການສະໜັບສະໜູນຕໍ່ໄປ ເພາະອະນາຄົດຂອງປະເທດລາວ ແມ່ນຢູ່ໃນກຳມືຂອງພວກເຂົາ!”