ວິທະຍາໄລ ເຕັກນິກ ກະສິກໍາ ດົງຄໍາຊ້າງ ຕັ້ງຢູ່ ບ້ານດົງຄໍາຊ້າງ, ເມືອງຫາດຊາຍຟອງ, ນະຄອນຫຼວງວຽງຈັນ. ວິທະຍາໄລດັ່ງກ່າວ ສ້າງຕັ້ງຂຶ້ນໃນປີ 1985 ພາຍໃຕ້ການອະນຸມັດ ຂອງ ເຈົ້າຄອງນະຄອນຫຼວງວຽງຈັນ ແລະ ໄດ້ຕັ້ງຊື່ ເປັນ “ໂຮງຮຽນວິຊາຊີບ ດົງຄໍາຊ້າງ”. ໃນປີ 1987, ວິທະຍາໄລດັ່ງກ່າວໄດ້ສະໜອງຫຼັກສູດການຮຽນຂອງຕົນຢ່າງເປັນທາງການເປັນເທື່ອທໍາອິດ ໃນສາມຂະແໜງຕົ້ນຕໍ ເຊັ່ນ: ປູກຝັງ, ລ້ຽງສັດ ແລະ ປ່າໄມ້.
ໃນປີ 1996, ໂຮງຮຽນໄດ້ປ່ຽນຊື່ ເປັນ “ໂຮງຮຽນເຕັກນິກກະສິກໍາ ດົງຄໍາຊ້າງ” ແລະ ໄດ້ຖືກມອບໃຫ້ຢູ່ພາຍໃຕ້ ກົມອາຊີວະສຶກສາ, ກະຊວງສຶກສາທິການ ແລະ ກິລາ. ໃນສົກຮຽນ 2013-2014, ໂຮງຮຽນ ໄດ້ສະໜອງຫຼັກສູດຮຽນເພີ່ມຂຶ້ນອີກ ໃນສາຂາ ກົນຈັກກະສິກໍາ. ໂຮງຮຽນດັ່ງກ່າວໄດ້ເລີ່ມຕົ້ນສະໜອງ ຫຼັກສູດປູກຝັງ-ລ້ຽງສັດ ລະດັບ 4 ແບບ ອສຄ ໂດຍການສະໜັບສະໜູນຈາກ ໂຄງການ VELA ໃນສົກຮຽນ 2016-2017. ໂຮງຮຽນດັ່ງກ່າວໄດ້ຖືກຍົກລະດັບເປັນ ວິທະຍາໄລ ແລະ ປ່ຽນຊື່ເປັນ “ວິທະຍາໄລ ເຕັກນິກ ກະສິກໍາ ດົງຄໍາຊ້າງ” ໃນປີ 2018. ໃນສົກຮຽນ 2019-2020, ວິທະຍາໄລ ເຕັກນິກ ກະສິກໍາ ດົງຄໍາຊ້າງ ໄດ້ສອນນັກຮຽນ ລູ້ນທີ 3 ໃນຫຼັກສູດ ແບບ ອສຄ. ໃນປະຈຸບັນ, ຈໍານວນນັກຮຽນທີ່ເຂົ້າຮຽນ ໃນຫຼັກສູດ ແບບ ອສຄ ມີທັງໝົດ 129 ຄົນ.
ວິທະຍາໄລ ເຕັກນິກ ກະສິກໍາ ດົງຄໍາຊ້າງ ກໍາລັງວາງແຜນຈະສະໜອງ ການຮຽນການສອນແບບ ອສຄ ໃນລະດັບ 5 ໃນ ສາມ ສາຂາ ເຊັ່ນ: ຜູ້ຈັດການຟາມ, ວິຊາການປູກຝັງ ແລະ ວິຊາການລ້ຽງສັດ. ວິທະຍາໄລ ເຕັກນິກ ກະສິກໍາ ດົງຄໍາຊ້າງ ໄດ້ຮ່ວມມືກັບ ຟາມ ແລະ ບໍລິສັດ ປະມານ 50 ແຫ່ງ (ໃນນັ້ນ 9 ແຫ່ງ ໄດ້ເຊັນບົດບັນທຶກຄວາມເຂົ້າໃຈ ກັບ ວິທະຍາໄລ) ເພື່ອສະໜັບສະໜູນນັກຮຽນໃນການຝຶກປະຕິບັດຕົວຈິງ.
*ໃນພາກນີ້, ພວກເຮົາສະໜອງຂໍ້ມູນ ຫຼ້າສຸດ ແລະ ຖືກຕ້ອງທີ່ສຸດ. ແຕ່ເຖິງຢ່າງໃດກໍ່ຕາມ, ສາຂາ ທີ່ຈັດການຮຽນ-ການສອນ ແບບຄວບຄູ່ (ອສຄ) ທີ່ສະໜອງຢູ່ສະຖານອາຊີວະສຶກສາຕ່າງໆ ອາດມີການປ່ຽນແປງ ຢູ່ເລື້ອຍໆ ເນື່ອງຈາກຫຼາຍປັດໃຈ. ເພື່ອຢາກໄດ້ຂໍ້ມູນວ່າ ສາຂາຮຽນ ທີ່ຈັດການຮຽນ-ການສອນ ແບບ ອສຄ ທີ່ເປີດສອນ ຢູ່ ສະຖານອາຊີວະສຶກສາ ໃນຕອນນີ້ ແມ່ນມີສາຂາໃດແດ່, ສາມາດຕິດຕໍ່ພົວພັນ ຫາສະຖານອາຊີວະສຶກສາໃນທ້ອງຖິ່ນ ໂດຍກົງໄດ້ ຕາມເບີໂທຕິດຕໍ່ ແລະ ທີ່ຢູ່ໃນນີ້
ແຜນທີ່ຢູ່ດ້ານລຸ່ມແມ່ນສະແດງໃຫ້ຮູ້ ສະຖານທີ່ຂອງ ວິທະຍາໄລ ເຕັກນິກ ກະສິກໍາ ດົງຄໍາຊ້າງ. ຄຼິກໃສ່ເຄື່ອງໝາຍ ເພື່ອເບິ່ງຂໍ້ມູນຕິດຕໍ່ລະອຽດ.
